تاند (یکشنبه، د عقرب ۲۸مه) د پاکستان په کراچۍ ښار کې ګڼ شمېر خلکو او د بشري حقونو فعالانو په خپل هیواد کې د افغان کډوالو او پښتنو خلاف د پاکستان د امنیتي ځواکونو اقدامات وغندل.
دوی چې د خپل اعتراض د څرګندولو لپاره په مظاهره راوتلي وو، له حکومت څخه وغوښتل چې د افغانانو او ځايي پښتنو غیرقانوني نیونې او ځورونې ودروي.
دوی وویل د افغان کډوالو په زوره ایستل نه یوازې نامسوولانه اقدام دی بلکې کرکه خپروي.
مظاهره چیانو په خپلو شعارونو او ویناوو کې وویل چې «د افغان کډوالو د ایستلو په اړه د پاکستان د موقت حکومت له پرېکړې وروسته پولیسو او نورو قانون نافذوونکو ادارو کرکه خپره کړې او په خورا نامسوولانه ډول یې د قانون خلاف د افغان کډوالو او د پاکستان د پښتنو ځورولو، بېرولو او نیولو ته دوام ورکړی دی.»
په همدې حال کې د کډوالو لپاره د ګډ اقدام کمېټې په نوم، د بشري حقونو سازمان چې د کراچۍ په مظاهره کې یې برخه لرله، ویلي چې پاکستان باید ومني چې د افغانستان په بې ثباتۍ او له خطر سره د میلیونونو انسانانو د ژوند په مخامخولو کې رول لري.
دې کمېټې همداراز ویلي:«که پاکستان پخوا مسوولانه اقدامات کړي وای، افغانان به د خپلو مېنو پرېښودو او مهاجرت ته نه مجبورېدل.»
دې کمېټې زیاته کړې چې د پاکستان د امنیتي ادارو د زور زیاتیو له کبله د اکتوبر له پیله تراوسه پورې تر ۳ لکه ډېر افغانان مجبوره شوي چې له پاکستانه ووځي.
د پاکستان حکومت د اکتوبر په بیل کې اعلان وکړ چې ټول بې اسناده افغان کډوال دې د نوومبر تر لومړۍ نېټې له پاکستانه ووځي او که ونه وتل وبه یې نیسي او په زور به یې وباسي خو عملاً د پاکستان پولیسو د اکتوبر له پیله د افغانانو ځورول، بندي کول، په زوره ورڅخه د پیسو اخیستل او له خپلې خاورې ایستل پیل کړل.
د پاکستان حکومت اوس ویلي چې پاتې بې اسناده کډوالو ته د جنورۍ تر لومړۍ وخت ورکوي چې له پاکستانه ووځي.
د پاکستان له دې اعلان سره سره، پاکستاني رسنیو نن راپور ورکړ چې پېښور کې د افغان کډوالو نیونې په پراخه پیمانه پیل شوي دي.
د ایکسپریس تریبیون ورځپاڼې د راپور له مخې، په پېښور ښار کې نیول کېدونکي افغان کډوال په نارباغ کې، چې پخوا د کډوالو کمپ و، د تمرکز مرکز ته بیول کېږي او بیا افغانستان ته استول کېږي.
په تېره یوه میاشت کې پاکستاني پولیسو نه یوازې بې اسناده بلکې اسناد لرونکي کډوال او حتي د قبایلي سیمو او سوات پښتانه هم نیولي او ځورولي دي.
دومره مکاري، حیله ګري او سپين سترګي هم څوک نکوي لکه دا پاکستانیان یا پاکستاني پښتانه.
هغه وخت چي پاکستاني پولیسو او ملیشو د افغانانو په ایستلو، بندي کولو، لوټلو، وهلو، ډبولو او تحقیرولو پیل کړي وؤ نو هغه وخت همدغو اوسنیو لاریونوالو او مظاهره چیانو نه یوازي د پولیسو سره مرسته کوله بلکي خپله یی هم د مظلومو، مزدورو او مجبوره افغانانو په چور تالان لاس پوري کړي وؤ. خو اوس چي هر څه پای ته ورسیدل او اوبه تر ورخ تيري شوي نو د منافقت او تمساح اوښکي تویوی.
افغانانو! پام کوئ او هوښیار اوسئ!