تاند(پنجشنبه، د عقرب ۲۵ مه) د بښنې نړیوال سازمان د پاکستان لخوا د پښتون ژغورنې غورځنګ د یوه مشر او د پاکستان ملي اسامبلۍ پخواني غړي، علي وزیر او نورو سیاسي فعالانو نیول کیدو ته غبرګون ښودلی.
د بښنې نړیوال سازمان د پاکستان له لنډمهالي حکومت غوښتي چې د بیان ازادۍ درناوی وکړي او د سیاسي مشرانو او فعالانو له نیولو دې ډډه وکړي.
علي وزیر او یو شمېر نورو پښتنو ملتپالو په وروستیو کې هغه پرلت ته د پاکستان خلاف توندې ویناوې وکړې، چې چمن کې له نږدې یوې میاشتې راهیسې پیل شوی.
دغه پرلت، پر چمن – سپین بولدک د تګ راتګ کوونکو افغانانو لپاره د ویزې او پاسپورټ د جبري کیدو خلاف پيل شوی.
پاکستان پریکړه کړې، چې نور به له ویزې او پاسپورټ پرته چا ته پر دې لاره د تګ راتګ اجازه نه ورکوي.