تاند (یکشنبه، د عقرب ۲۱ مه) د بهرنیو اسعارو په وړاندې د افغانۍ ارزښت په اوو کلونو کې تر ټولو لوړې اندازې ته ورسید.
په وروستیو ورځو کې د ډالر او نورو بهرنیو اسعارو په وړاندې د افغانۍ ارزښت په داسې حال کې مخ په لوړېدو دی چې د ګاونډیو هیوادونو د پیسو ارزښت په ټیټېدو دی.
نن (یکشنبه) د کابل په شهزاده سرای کې، چې د افغانستان د پیسو د تبادلې تر ټولو لوی بازار ګڼل کېږي، هر ډالر پر څه کم ۶۷ افغانۍ تبادله شو.
د جمهوري نظام په لومړیو کې د نویو افغاني نوټونو له چاپېدو وروسته یو ډالر په ۴۸ افغانۍ تبادله کېده. دې وضعیت ډیر کلونه دوام وکړ خو د جمهوري حکومت په وروستیو کلونو کې، چې ډېرو خلکو له افغانستانه پیسې ایستلې د افغانۍ ارزښت د ډالر په وړاندې ولوېد او هر ډالر په شاوخوا ۸۰ افغانۍ تبادله کېده.
څرګنده نه ده چې په وروستیو څو ورځو کې د افغانۍ ارزښت دقیقاً ولې لوړ شوی دی خو تر دې مخکې افغانستان ته د نړیوالې ټولنې له لوري د بشري مرستو په خاطر په اوونۍ کې تر ۴۰ میلیون ډالرو پورې راتګ د افغانۍ د ارزښت د دوام دلیل بلل کېده.
ځینې وايي چې له پاکستان او ایران څخه د لکونو افغانانو راتګ هم ممکن د افغانۍ پر ارزښت مثبت اغېز کړی وي. خو ځیني اقتصادپوهان د ګاونډیو هیوادونو د پیسو پر ځای په افغانیو د معاملو زیاتېدا د افغانۍ د ارزښت په لوړېدو کې مهم عامل بولي. د دوی په وینا دې کار په بازار کې د افغانیو لپاره تقاضا زیاته کړې ده.
نن سهار په شهزاده سرای کې ۱۰۰۰ پاکستانۍ روپۍ په ۲۴۲ افغانۍ او یو انګلیسي پونډ په ۸۲ افغانۍ تبادله کېده.
نرخ هم ارزانه کیږی ؟؟که نرخونه ارځانه نشي د ملت په درد نخوري !