تاند (چهارشنبه، د عقرب ۱۷مه) د طالبانو حکومت د پاکستان د موقت صدراعظم د تازه ادعاوو په وړاندې په غبرګون کې وویل چې دوی هیچا ته اجازه نه ورکوي چې د افغانستان خاوره د بل هیواد پر ضد وکاروي خو «اسلامي امارت په پاکستان کې دننه د امن ټینګولو مسوولیت نه لري.»
د پاکستان د لنډمهاله حکومت مشر انوارالحق کاکړ نن په یوه خبري غونډه کې ادعا وکړه چې د افغانستان خاوره د پاکستان پر ضد کارول کېږي.
ده همداراز وویل، په افغانستان کې د طالبانو له واک ته رسیدو وروسته په پاکستان کې انتحاري بریدونه ۵۰۰ سلنه زیات شوي دي.
خو د طالبانو د حکومت ویندوی ذبیح الله مجاهد په یوه اعلامیه کې د انوارالحق کاکړ د ادعاوو د ردولو ترڅنګ ویلي چې «هغوی باید خپل کورني مسایل په خپله حل کړي او د خپلو ناکامیو ملامتي افغانستان ته راجع نه کړي.»
د پاکستان سرپرست صدراعظم د دې ادعا په ځواب کې چې د طالبانو د حکومت له واک ته رسیدو وروسته په پاکستان کې تروریستي پېښې ۶۰ سلنه زیاتې شوي او انتحاري بریدونه بیا ۵۰۰ سلنه ډېر شوي دي، ذبیح الله مجاهد ویلي:«دا د دې دلیل نه شي کیدای چې ګنې موږ به د پاکستان د نا امنیو تر شا یو.»
د روانې اوونۍ په پیل کې د پنجاب ایالت په میاوالي کې د پاکستان پر یوه هوايي ډګر له وسله وال برید وروسته پاکستاني چارواکو ادعا وکړه چې په دغه برید کې په افغانستان کې له امریکا پاتې وسلې کارول شوي خو د طالبانو حکومت دا موضوع رد کړه چې ګنې په افغانستان کې د دوی لاس ته ورغلي وسلې د بل چا لاس ته ورغلي او هغه په پاکستان کې کارول شوي دي:« په افغانستان کې وسلې محفوظې دي، د هیچا لاس ته نه دي ورغلی، د وسلو قاچاق ممنوع دی او د هر ډول غیر قانوني اقداماتو مخه نیول شوې.»
پرون د امریکا د بهرنیو چارو وزارت له مرستیال ویاند ویدانت پیټل څخه هم په یوه خبري غونډه کې په دې اړه پوښتنه وشوه خو هغه دا ادعا په کلکه رد کړه.
د سیاسي چارو کتونکي دا خبره ردوي چې افغان طالبان به د پاکستاني طالبانو تسلیحاتي ملاتړ کوي خو دا احتمال نه ردوي چې په افغانستان کې د طالبانو واک ته رسیدا پاکستاني طالبان هم زړه ور کړي او دا هیله یې ورزیاته کړې چې که دوی هم مبارزې ته دوام ورکړي، بریالي کېدای شي.
نن هم د ټي ټي پي ویاند محمدخراساني په یوه خبرپاڼه کې ادعا کړې چې د کورمې ایجنسۍ په کرک ولسوالۍ کې یې د پولیسو پر یوې تاڼې حمله کړې او پولیسو ته یې درنه مرګ ژوبله اړولې ده.
کاکړ: د طالبانو له واک ته رسیدو وروسته په پاکستان کې انتحاري بریدونه ۵۰۰٪ زیات شوي