تاند (چهار شنبه، د میزان ۲۶مه) د امریکا د جمهوریپال او دیموکرات ګوندونو اکثره غړي په دې باور لري چې د افغانستان جګړه په دې نه ارزېده چې امریکا هلته ځواک ولیږي.
د بریتانیا د پیرسن انستیتیوت له نظرپوښتنې سره سم، د جمهوریپالو او دیموکارتو غړي په دې موافق دي چې د افغانستان جګړه په دې نه ارزېده چې امریکايي پوځیان پکې وجنګېږي.
په دې نظرپوښتنه کې ۶۵ سلنه دیموکراتانو او ۶۳ سلنه جمهوریپالو په افغانستان کې د امریکا له شل کلنې جګړې سره مخالفت کړی دی.
دوی کابو ټول په دې برخه کې باورمن نه دي چې امریکا دې د تروریزم د له منځه وړلو یا د افغان ښځو د وضعیت د ښه کولو په شان د مشخصو هدفونو په پوره کولو کې بریالۍ شوې وي.
د جمهوریپال ګوند مارتین سټېفن، چې ۸۷ کلن دی، ویلي:«له پیله څرګنده وه چې بریالي کېدای نه شو.»
د پیرسن انستیتیوت استاده ملیحه چشتي وايي، په شل کلنه جګړه کې ډېر افغانان او امریکایان وژل شوي او میلیاردونه ډالر لګول شوي خو د افغانستان حکومت په نهایت کې نسکور شو.