تاند:(شنبه، د میزان ۲۲مه) په غزني کې د یوه «۵۸۰» ډوله مساپر وړونکي بس د لوېدو له امله یو تن وژل شوی او ۴۵ نور ټپیان دي.
دغه پېښه د غزني مرکز اړوند د کابل ـ کندهار په لویه لار د روضې کوتل ته څیرمه شوې ده.
د طالبانو ځایي چارواکو ویلي، چې دغه موټر هغه تخریب شوی پلچک ته لوېدلی چې د جوړونې په موخه کندل شوی دی.
د دوی په وینا، د پېښې ټول ټپيان د درملني په موخه د غزني ملکي او حوزوي روغتونونو ته لیږدول شوي دي.
سرچینې په دې اړه نور معلومات نه دي ورکړي.
غزني د کابل – کندهار پر لویه لاره پروت ولایت دی او ګومان کیږي، چې دا اوښتی بس به هم د یادې لویې لارې د سپرلیو لېږدونکی وي.
د دغې لارې پر بس چلوونکو او اړوندو شرکتونو له ډېره وخته د ناسم موټر چلولو تور دی.
یاده لویه لاره د افغانستان له تر ټولو مرګونو لارو څخه ده او خلک یې له طالب چارواکي د ترافیکي پېښو د مخنیوی لپاره د لازمو اقداماتو ترسره کیدل غواړي.