تاند (جمعه، د میزان ۲۱مه) د افغانستان د ازادۍ جبهې نن په بغلان ولایت کې د شیعه ګانو پر امام زمان جومات د تروریستي برید د غندلو په اړه خپله اعلامیه له ایکسپاڼې لېرې کړه.
دې جبهې په خپله ایکسپاڼه کې لیکلي و چې «د بغلان لایت په پلخمري کې د امام زمان پر جومات تروریستي برید په سختو ټکو غندي او دا عمل د انساني او اسلامي معیارونو خلاف بولي…»
دا جبهه تقریباً هره ورځ پر طالبانو د حملو ادعاوې کوي خو تراوسه پورې د هغوی کومه ادعا د خپلواکو سرچینو له لوري تایید شوې نه ده.
له دې پوسټ وروسته د داعش خراسان څانګې په خپله اعماق ویبپاڼه کې د دې برید مسوولیت ومانه.
د بغلان په امام زمان جومات د حملې د غندلو په اړه د ازادۍ جبهې له لوري د خپل پوسټ لېرې کېدو ځینو کتونکو ته پوښتنې پیدا کړي دي.
د ځینو ناتایید شویو راپورونو له مخې، د طالبانو د حکومت دواړه وسله والې مخالفې ډلې هڅه کوي چې د داعش همکاري ترلاسه کړي. ممکن د ازادۍ جبهې له لوري له ایکسپاڼې څخه د خپل پوست د لرې کېدو یو دلیل همدا وي.
د پلخمري په امام زمان جومات کې چاودنه د جُمعې د لمانځه په ترڅ کې وشوه.
په بغلان کې د طالبانو د حکومت د اطلاعاتو او کلتور د ريیس مصطفي هاشمي په وینا په دې انتحاري برید کې ۷ تنه وژل شوي او ۱۷ نور ژوبل دي.