افغانستان د اورغورځونکو په مدیترانه ــ اندونیزیا کمربند کې پروت هیواد دی، چې په همدې بنسټ باید د اتشفشانونو د راوتلو انتظار ولرو، د هیواد په بېلابېلو سیمو کې تر (۵۰) زیات داسې مخروطونه شته چې د اورغورځوونکو په مرسته جوړشوي دي خو د منځ ته راتلو دقیق او څرګند وخت یې معلوم نه دی، جیولوجي پوهان وایي د افغانستان اورغورځونکي مخروطونه ښایي (۰،۵ــ ۲) میلیونه کاله مخته منځ ته راغلي وي، ډېری جیولوجي پوهان د افغانستان اورغورځونکي خاموش او مړه بولي خو د هیواد په ځینو سیمو کې د ګرمو اوبو چینې دا څرګندوي چې د افغانستان اورغورځونکي خاموش نه بلکې ویده اورغورځونکي دي.
د افغانستان د اورغورځونکو بنسټیز ګروپ د غزني ولایت په ناور ولسوالۍ کې دی چې (۴۰۰۰) کیلومتره مربع ځمکه په بر کې نیسي او تر سل کیلومتر مکعب زیات لاوایي تجمعات پکې شته.
همدارنګه د فراه ولایت په فراه رود سیمه کې درې لوی اورغورځېدلي مخروطونه شته چې لوړوالی یې (۲۰۰) متره او قاعده یې (۵۰۰) متره اوږدوالی لري، د فراه د اورغورځونکو په اړه داسې فکر کیږي چې دا د افغانستان تر ټولو ځوان اورغورځونکي دي، همدارنګه د افغانستان په سویل لوېدیځو سیمو کې هم د اتشفشانونو سترې نښې تر سترګو کیږي.
په افغانستان کې تر ټولو ستر او زړه راکښونکی اتشفشان د هلمند د سیند په کیڼ اړخ کې د خانشین اتشفشان دی چې د هوارو دښتو په منځ کې د ۷۵۰ مترو په لوړوالي سره را څرګند شوی دی.