تاند:(چارشنبې، د میزان ۱۹مه) په هرات کې د طالبانو سیمه ییز چارواکي وایي، ننۍ زلزلې هم د دغه ولایت په ځینو سیمو کې یو شمېر خلک ټپیان کړي دي.
دوی زیاته کړې، چې زیانمنو سیمو ته ګرځنده روغتیایي او د ژغورنې ټیمونه رسېدلي او د ټپیانو د انتقال لړۍ پیل شوې ده.
د حوزوي روغتون مسولینو بیا خبر ورکړی، چې د ننۍ زلزلې له امله یو شمېر ټپیان وروړل شوي دي.
ځینو رسنیو بیا په وروستۍ زلزله کې د یوتن د مړه کېدو او ګڼو نورو ټپي کېدو راپورونه خپاره کړي دي.
دغه زلزله نن سهار ۵:۳۰ دقیقې رامنځته شوې ده.
د یادې زلزلې چټکتیا یو شمېر رسنیو د مخکینۍ خونړۍ زلزلې معادل ګڼلې ده.
تراوسه د دې زلزلې د زیانونو په اړه راپورونه دقیق او وروستي نه دي.
د څو ورځې مخکې زلزلې په هرات کې نږدې دوه نیم زره کسان مړه او زرګونه نور ټپیان کړل.
د هغې زلزلې د مرګ ژوبلې ارقام هم ډېر دقیق نه دي ګڼل شوي.
طالب چارواکو په وروستیو ارقامو کې د ټولې مرګ ژوبلې سطحه شاوخوا ۴ زره تنه ښودلې وه.