تاند(سې شنبه، د میزان ۱۸مه) په هرات ولایت په زلزله کې د وژل شویو د شمېر په اړه لا هم ضد و نقیض شمېرې خپرېږي خو څه چې تر دې دمه جوت دي دا دي چې دا د ترکیې او سوریې له وروستۍ زلزلې وروسته تر ټولو مرګونې زلزله وه.
د ترکیې او سوریې په زلزله کې شاوخوا ۵۰ زره کسان مړه شول.
د روغتیا د نړیوال سازمان د ډاکتر الله ابو زید په وینا د هرات زلزله د ورځې په څه باندې یوولس بجې وشوه، له همدې کبله د زلزلې اکثره قربانیان ماشومان او ښځې وې.
ده رویټرز خبري اژانس ته په مرکه کې وویل:«د هغو کسانو په منځ کې چې سخت ژوبل شوي، په درو کې دوې برخې ماشومان او ښځې دي.»
ده په عین حال کې په دې خاطر چې له افغانستانه پام د نړۍ نورو برخو ته اوښتی، له زلزله خپلیو سره د مالي مرستو په اړه اندېښنه ښکاره کړه.
ابوزید وویل:«ډېره دردوونکې ده چې ماشومان په روغتون کې په خراب حالت کې څو ویني.»
ده همداراز وویل:«ما یو ماشوم ولید چې د ۳ یا څلورو میاشتو و او په سر سخت ژوبل شوی و.»