تاند:( شنبه، د میزان ۱۵ ) د طالبانو چارواکو په پنجشېر کې د قاچاقبرو له منګولو د ۱۷ ماشومانو د ژغورنې خبر ورکړی.
د ياد شوي ولايت لپاره د طالبانو امنيې قوماندانۍ د يوې خبرپاڼې په خپرولو سره ويلي، چې د د دې قومندانۍ منسوبينو پرون درې تنه انساني قاچاق وړونکي د ۱۷ ماشومانو د انتقال پر مهال نيولي دي.
په خبرپاڼه کې زياته شوې، چې يادو قاچاق وړونکو غوښتل دغه ۱۷ ماشومان په غير قانوني توګه ايران هېواد ته ولېږدوي.
سرچينې زياته کړې، چې ژغورل شوي ماشومان د بېلابېلو شمالي ولايتونو اوسېدونکي وو.
دا په داسې حال کې ده، چې مخکې یو شمېر نړیوالو سازمانونو په پنجشېر کې د طالبانو مخالفه وسله واله ډله( ملی مقاومت جبهه) او طالبان دواړه په جګړه کې د ماشومانو په ګومارلو تورن کړي وو.