تاند- په اسلام اباد کې د طالبانو د پخواني حکومت د سفیر ملاعبدالسلام ضعیف «د ګوانتنامو انځور» په ایران کې په فارسي ترجمه او چاپ شو.
د ښاغلي ضعیف دا کتاب احمد ترجمان ژباړلی او د ایران مطبوعاتي موسسې خپروندویې ټولنې د «زندګی با طالبان» په نوم خپور کړی دی.
د ایران د مهر خبري اژانس د راپور له مخې، «زندګی باطالبان» د طالبانو د یوه پخواني جګپوړي غړي ملاعبدالسلام ضعیف د ژوند کیسه ده. د کتاب لیکوال په پاکستان کې د سفارت د دورې او همداراز په ګوانتنامو محبس کې د خپل څلور کلن ژوند خاطرې بیان کړي دي.
عبدالسلام ضعیف خپله کیسه د کندهار ولایت په یوه کلي کې له زوکړې او ماشومتوبه پیلوي او د خپلې مور او پلار یادونه کوي چې د ده په ماشومتوب کې له دنیا ولاړل.
ده په ۱۹۸۳ م کال مبارزه پیل او په دې موده کې یې د طالبانو د مشر ملامحمد عمر مجاهد په شمول د جهاد له ډیرو اصلي مشرانو سره ولیدل او همکاری یې ورسره وکړه.
تر دې وړاندې د امریکا د کولمبیا پوهنتون خپرندویې موسسې د ملاضعیف خاطرې «له طالبانو سره زما ژوند» په نوم خپرې کړې وې. دا خاطرې د لندن د ختیځو او افریقايي مطالعاتو د پوهنځي د دوو فارغانو، الیکس سټریک وان لینساني او فلیکس کوهن له لوري په انګلیسي ژبه ژباړل شوې دي.