تاند (چهارشنبه، د میزان ۱۲مه) د خوړو نړیوال پروګرام نن اعلان وکړ چې اسیايي پراختیايي بانک په افغانستان کې له اړو کسانو سره سل میلیون ډالره مرسته کړې ده.
د ملګروملتو د خوړو نړیوال پروګرام، د اسیايي پراختیايي بانک د دې مرستې هرکلی وکړ.
دې پروګرام ویلي چې دا نوې مرسته به په افغانستان کې پر زیانګالو وګړو، په تېره بیا ښځو ولګوي.
د خوړو نړیوال پروګرام په یوه خبرپاڼه کې ویلي، په دې مرسته د خوړو نړیوال پروګرام همداراز له هغو ښځو سره مرسته کوي چې غذايي مصونیت نه لري او همداراز به د کرنې په سیکتور کې د مېوو او سبزیو د تولید په شمول د مهارتونو په ورزده کولو کې ورڅخه کار واخلي.
په داسې حال کې چې مرستندویې ادارې له افغانستان سره د مرستې د کمېدو په اړه پر له پسې اندېښنې ښيي، د اسیايي پراختیايي بانک سل میلیون ډالري مرسته مهمه ګڼل کېږي.
د خوړو نړیوال پروګرام ريیس شا وي لي په دې اړه وویل:«دا مرسته په یوه حساس وخت کې له افغانستان سره کېږي، هغه هیواد چې ۱۵ میلیونه وګړي یې له لوږې سره مخامخ دي او د بودجې د سخت کمښت له امله د خوړو نړیوال پروګرام یوازې ۳ میلیون تنو ته بیړنۍ مرستې رسولی شي.»