تاند (سې شنبه، د میزان ۱۱ مه) د پاکستان دولتي رسنیو اعلان وکړ چې حکومت پرېکړه کړې چې تر یو میلیون ډېر غیرقانوني کډوال، چې د دوی په ادعا په تروریستي فعالیتونو کې لاس لري یا یې تمویلوي، له خپلې خاورې باسي.
د پاکستان اسوشیتید پریس خبري اژانس د یوې بې نومه سرچینې په قول ویلي، ټولټال یو میلیون او یولک بهرنیان چې د پاکستان ملي امنیت ته جدي ګواښ پېښوي او ټول غیرقانوني اوسي، په لومړي پړاو کې ایستل کېږي.
سرچینه زیاتوي، په دوهم پړاو کې به د افغانستان تابعیت لرونکي ایستل کېږي او په درېیم پړاو کې به هغه کسان ایستل کېږي چې په پاکستان کې د هستوګنې کارتونه نه لري.
سرچینې همداراز ویلي، د غیرقانوني افغان کډوالو د ایستلو پلان هم تصویب شوی ځکه چې ډېری یې د تروریستانو په قاچاق کولو او ورته د اسانتیا په برابرولو کې لاس لري او ۷ لکه افغانانو په پاکستان کې هستوګنه تمدید کړې نه ده.
راپور وايي، د افغانانو د ایستلو پلان د کورنیو چارو وزارت د اړوندو خواوو او د افغانستان د حکومت په مشوره ترتیب کړی دی.
پاکستان دا اعلان وروسته له دې وکړ چې په خپل هیواد کې یې د افغانانو د نیونو او ځورونو پراخ کمپاین پیل کړ او د بشري حقونو سازمانونو پرې نیوکې وکړې.
د ملګروملتو د کډوالو د لویې کمیشنرۍ پر اساس په پاکستان کې ۱۳ لکه افغانان راجستر دي او ۸ لکه ۸۰ زره نور بې اسناده یا غیرقانوني اوسي.