تاند( سې شنبه، د میزان ۱۱مه) د ننګرهار لپاره د طالبانو ادارې خبر ورکړی، چې په تورخم ښارګوټي کې د هغو مرستو لړۍ دریدلې، چې تر اوسه له پاکستان څخه هېواد ته ستنیدونکو افغان کډوالو سره ترسره کیدې.
د طالبانو ادارې په یوه خپره کړې خبرتیا کې ویلي، چې د دغې مرستې د دریدو خبر په تورخم کې مرسته کوونکو نړیوالو بنسټونو ورسره شریک کړی او دلیل یې د ستنیدونکو کډوالو د شمېر زیاتوالی ښودلی.
سرچینې زیاته کړې، چې دغه مرستې له پرون دوشنبې ورځې راهیسې دریدلي دي.
طالبانو د هغو مرستندویو ادارو نومونه نه دي اخیستي، چې یادې مرستې یې ترسره کولې.
د ځینو راپورونو له مخې، دا مرستې تر ډېره د ای او ایم یا د کډوالۍ د نړیوال سازمان له لوري ترسره کیدې.
دا په داسې حال کې ده، چې تازه پاکستان له خپلې خاورې د سلګونه زره ناقانونه افغان کډوالو د ویستو خبر ورکړی.
ځینو رسنیو ویلي، چې په دې اړه د طالبانو رژیم هم پاکستاني چارواکو سره هوکړه لري.
طالبانو د پاکستان د تازه پریکړې په اړه څه نه دي ویلي.