تاند:( سې شنبه، د میزان ۱۱مه) د طالبانو د بهرنیو چارو وزیر مولوي امیرخان متقي نن د یوه پلاوي په مشرۍ چین ته تللی.
د هغه یوه ویاند حافظ ضیا احمد ویلي، ټاکل شوې چې متقي او ملګری پلاوی یې د چین په شي ژانګ ایالت کې د ترانس همالیا فورم په درېیمه ناسته کې ګډون کوي.
د راپورونو له مخې، دغه دوه ورځنۍ غونډه سبا چهارشنبه د اکتوبر په څلورمه پيلیږي.
د طالبانو د بهرنیو چارو سرپرست وزیر تېره اونۍ د مسکو فارمټ شپږمې غونډه کې د ګډون په هدف لومړی مسکو او بیا د تاتارستان کازان ښار ته سفر کړی و.
چین او روسیې دواړو په خپله خاوره کې د افغانستان سفارتونه د طالبانو رژیم ته سپارلي او ښې اړیکې ورسره لري، خو د دوی په ګډون د نړۍ هېڅ هېواد د طالبانو رژیم په رسمیت نه پېژني.