تاند (دوشنبه، د میزان ۱۰مه) د طالبانو د حکومت له شخصیتونو سره د تماس کمیسیون وايي چې تراوسه پورې د پخواني حکومت نژدې ۷۰۰ چارواکي، سیاستوال، د ملي شورا غړي او متخصصان بېرته هیواد ته ستانه شوي دي.
د دغه کمیسیون ویندوی احمدالله وثیق رسنیو ته وویل:«له بیلابیلو هیوادونو ۶۸۰ تنه بېرته هیواد ته راغلي دي.»
د ده په وینا په راستنو شویو شخصیتونو کې د وزیرانو او معینانو په کچه پخواني حکومتي چارواکي او همداراز د امنیتي او استخباراتي اورګانونو مسوولان شامل دي.
ده همداراز وویل چې ګڼو نورو سیاستوالو او د پخواني حکومت چارواکو د بېرته راستنېدو فورمې ډکې کړي او ژر به هیواد ته راشي.
د پخواني حکومت له چارواکو سره د تماس د کمیسیون ویندوی زیاته کړه:«موږ سلګونه فورمې وېشلي او لیږلي، هیله لرو چې په لنډ وخت کې لا ډېر کسان هیواد ته بېرته راشي او البته په اوسنیو شرایطو کې د بېرته راستنېدو بهیر په مناسب ډول دوام لري.»
طالبانو په ځلونو پخوانیو دولتي چارواکو ته بلنه ورکړې چې بېرته خپل هیواد ته ستانه شي.
طالبان پخوانیو چارواکو ته د سر او مال تضمین ورکوي خو دنده نه ورکوي.