تاند:( یکشنبه، د میزان ۹ مه) په کندوز کې د سپین زر دولتي شرکت له لوري د هېواد له کروندو د راټولو شويو ۱۵۰ ټنه وچو رومیانو لومړۍ محموله اروپا ته واستول شوه.
د دولتي شرکتونو لپاره د طالبانو د رژیم عمومي رئیس مولوي عبدالحميد اخندزاده وویل، دا د دوی د رژیم لپاره یوه ستره لاسته راوړنه ده، چې د هېواد سبزیجات او ترکاري یې اروپایي هېوادونو ته استول کېږي.
اخندزاده زیاته کړه، د طالبانو رژیم غواړي د واخان له لارې هېواد له اروپا او آسیا سره وصل کړی دی.
د سپین زر دولتي شرکت رئیس عبدالحفیظ فریاد وویل، په وچو رومیانو سربیره د افغانستان لاسي صنایع هم نورې نړۍ ته صادرې شوې دي.
د طالب چارواکو په وینا، سپین زر دولتي شرکت د تېرو ۲۱ کلونو راهیسې غیر فعال و، چې د دوی په بیا واکمنیدو سره بیا فعال او اوسهال په کې پنبه، د پنبې غوړي، کونجاړه او کاغذي دسمالونه جوړ او پروسس کېږي.