تاند (دوشنبه، د سنبلې ۲۰ مه) د پکتیا ولایت د مرکز ګردیز او زرمت ولسوالۍ ترمنځ د شل کیلو متره سړک د جوړول چارې پرون رسماً پیل شوې.
دا سړک، چې ټاکل شوې ده نهه متره سور به لري، د دوهم لاټ پر پخولو یې ۳۳۵ میلیون افغانۍ لګښت راځي. دا ګردېز – زرمت سړک د ڼولګټو چارو وزارت په پرمختیایي بودیجې د ایچکو سړک جوړونې شرکت له لوري جوړېږي.
د باختر خبري اژانس د راپور له مخې، د ایچکو ساختماني او سړک جوړونې شرکت مسوولان وایي، چې د ګردیز، زرمت سړک د پخولو چارې یې په دوو لاټونو کې په قرارداد اخیستلي، چې د ۵ کیلو متره کار یې پخوا بشپړ شوی همدارنګه په لومړي لاټ کې د ۵ کیلو متره سړک پخولو کار پیل شوی او په دوهم لاټ کې ۱۰ کیلو متره سړک به په ۳۳۷ میلیون افغانیو په راتلونکي کال کې پیل شي.
د یاد سړک د پخولو چارو د پرانیستلو په مراسمو کې د ټولګټو چارو وزرات تخنیکي او مسلکي مرستیال عبدالکریم فاتح ډاډ ورکړ، چې د دې پروژې چارې به په ښه کیفیت تر سره شي او ورکړل شوې بودیجه به د سړکونو په رغولو او جوړولو مصرف شي.
د سیمي یو شمېر قومي مشرانو د یاد سړک په پخولو خوښي وښوده او زیاته یې کړه، چې د دې سړک په پخولو سره به یې ډېرې ستونزې حل او ګڼې اسانتیاوې به رامنځ ته شي.
د سیمې اوسیدونکي وايي چې د جمهوریت په مهال پر دغه سړک څو ځلې کار پیل شو خو طالبانو اجازه نه ورکوله چې هغه جوړ شي.