تاند: (سې شنبه، د وږي ۱۳ مه ) د طالبانو د بهرنیو چارو وزارت سرپرست مولوي امیرخان متقي په خپل کاري دفتر کې د افغانستان لپاره د جاپان له سفیر تاکاشي اوکاډا سره کتلي.
د متقي دفتر وایي، په دې لیدنه کې تاکاشي اوکاډا په افغانستان کې د رامنځته شوی امنیت، له نشه يي توکو سره د مبارزې او اقتصادي ودې په برخو کې د طالبانو لاسته راوړنې د پام وړ وبللې.
نوموړي د کابل واکمن رژیم سره د اړيکو د پراختیا او پیاوړتیا لپاره د جاپان حکومت ژمنتیا یو ځل بیا تکرار کړه او د افغانستان په اړه يې د ملګرو ملتونو د امنیت شورا د ۲مې غونډې په اړه مالومات وړاندې کړل.
د جاپان سفير زياته کړه، چې د طالبانو پر غوښتنو به په ياده غونډه کې جدي بحث وکړي.
سرچينې همدارنګه وويل چې نړېوال طالب رژيم سره د اقلیم بدلون، د اوبو مدیریت، تاریخي اثارو او روغتیا په برخو کې همکاري ته لېواله دي.
په ورته وخت کې د بهرنیو چارو وزارت سرپرست مولوي امیرخان متقي ویلي، د راتلونکي وخت لپاره د سيمې او نړۍ له هېوادونو سره د ډېپلوماتیکو اړیکو پراختیا او د اقتصادي فرصتونو څخه د ګټورې استفادې لپاره موخې ټاکلې دي.
متقي زياته کړه، چې د دوی او نړېوالې ټولنې ترمنځ د نشه يي توکو پر وړاندې د مبارزې، د افغانستان له خاورې څخه د نورو هېوادونو نه تهدید، د امنیت ټينګښت او نورو برخو کې ډېر موضوعات حل شوي دي او اوس د تعامل لپاره يوه ښه د اعتماد فضا رامنځ ته شوې ده.