تاند: (شنبه، د وږي ۴ مه ) د ایران د بهرنیو چارو وزیر حسین امیرعبداللهیان نن د طالبانو د بهرنیو چارو وزیر مولوي امیرخان متقي سره ټلیفوني خبرې کړي.
ایراني رسنیو ویلي، چې په دې ټلیفوني اړیکه کې د هلمند سېند د اوبو په اړه د خبرو پر دوام، په کابل کې د نیول شوي او بیرته خوشې شوي ایراني خبریال، په افغانستان کې د ټولو لوریو د همکاریو او نورو مسایلو په تړاو خبرې شوې دي.
طالبانو، څو ورځې مخکې په کابل کې د ایران د تسنیم خبري اژانس یو خبریال حسین ولایتي نیولی و، چې ویل کیږي په ناقانونه او مرموزه توګه افغانستان ته راغلی و.
نن رسنیو د نوموړي د خوشې کیدو خبر ورکړی، خو طالب چارواکو یې په اړه څه نه دي ویلي.
له دې سره ویل کیږي، چې ایران په منظمه توګه د هلمند سېند د اوبو سطحې د معلومولو لپاره افغانستان ته د خپلو متخصصینو د ورتلو غوښتنه لري.