تاند: (جمعه، د وږي ۳ مه ) د ماین پاکولو لپاره د طالبانو د رژیم چارواکي وایي، چې سږ کال په افغانستان کې د ناچاودو ماینونو او چاودېدونکو توکو په چاودنو کې اوښتې مرګژوبله د تېر کال په پرتله زیاته شوې ده.
په دې اړه د طالبانو د رژیم یوه مقام نور الدین رستم خېل ویلي، چې په تېرو ۸ میاشتو کې د دغو ماینونو د چاودنو له کبله ۲۱۳ افغان ماشومانو ته مرګژوبله اوښتې ده.
د رستم خېل په وینا، د سږ زېږدیز کال له پیل راهیسې د هېواد په بېلابېلو برخو کې ۱۶۹ ماینونه چاودېدلي چې له کبله یې ۳۲۱ کسانو ته مرګژوبله اوښتې ده.
د ملګرو ملتونو د ماشومانو د ملاتړ صندوق یونیسف تازه ویلي چې افغانستان په نړۍ کې له جګړو د را پاتې ناچاودو ماینونو څخه د ډکو هېوادونو له ډلې یو دی او د دغو چاودنو ۸۵ سلنه قربانیان ماشومان دي.
طالب چارواکو د دغو پېښو اصلي دلیل نه دی ښودلی، خو یو شمېر خلک اقتصادي ناورین د ناچاوده توکیو را ټولولو ته د ماشومانو د مجبوریدو اصلي لامل یادوي.