تاند: (سې شنبه، د زمري ۳۱ مه ) د طالبانو د کورنیو چارو وزی سراج الدین حقاني په ارزګان کې د یوې غونډې پر مهال پاکستاني چارواکو ته ویلي، چې خپلې کورنۍ ستونزې په خپله حل کړي.
نوموړي زیاته کړې، چې په پاکستان کې وروستۍ پېښې د هغه هېواد کورنۍ ستونزې دي او دوی پورې اړه نه لري.
هغه دا هم ویلي، که پاکستان ستونزې د زور له لارې هواروي د افغانستان او پاکستان ولسونو ته به زیان ورسیږي.
د طالبانو دغه لوړپوړي مقام دا هم زیاته کړې، چې د دوی حکومت له نړیوالې ټولنې سره ډپلوماټيکې اړیکې غواړي.
سراج الدین حقاني د زمري په اته ویشتمه، د افغانستان د خپلواکۍ د ۱۰۴ مې کلیزې د درناوي په مراسمو کې پر پاکستان ضمني نیوکې کړې وې.
هغه ویلي وو، چې یو شمېر ګاونډیان د خلاف پلمې لټوي.
شنونکو دا انګېرلې وه، چې د حقاني اشاره پاکستان ته ده.
پاکستان په وروستیوکې بیا- بیا ادعا لري، چې ګواکې تحریک طالبان پاکستان په افغانستان کې پټنځایونه او ملاتړ لري او له هغه ځایه د دوی خلاف بریدونه سمبالوي.
د طالبانو رژیم دا ادعاوې بې اساسه بولي.