تاند- د افغانستان د ښځو د فوټبال د لوبډلې لوبغاړې، چې د استرالیا په ملبرن کې جلاوطنه دي، د نوبل د سولې د جایزې د ګټونکې ملالې یوسفزۍ په لیدو خوشاله شوې دي.
ملاله یوسفزۍ د یوه کمپاین په وسیله هڅه کوي چې د افغان نجونو د فوټبال لوبډله د فیفا یا د فوټبال د نړیوال فدراسیون له لوري د افغانستان د جلاوطنه ملي لوبډلې په توګه په رسمیت وپېژندل شي.
د دې هدف لپاره ۱۶ لکه لاسلیکونه ټول شوي دي.
د افغانستان د نجونو د فوټبال مدیره خالده پوپل وايي چې باید د خپل هیواد د استازو په توګه د لوبډلې د لوبغاړو غوښتنې ته درناوی وشي.
دا زیاتوي:«د نړۍ د ټولو برخو خلک زموږ ترڅنګ دي. د ملالې او د ملبرن د کلب په شان حیرانوونکي کسان زموږ ملاتړ کوي. موږ هیله لرو. خوشاله یوو چې په دې هڅه کې یوازې نه یوو.»
فیفا وايي، دا واک نه لري چې یو ټیم تر هغو په رسمیت وپېژني چې د هماغه هیواد اړونده ادارې یې ونه مني.
خو ملاله یوسفزۍ وايي چې دا اصول باید بدل شي:
«په نهایت کې څه چې مهم دي، قوانین او مقررات نه دي. څه چې مهم دي دا دي چې لوبغاړې لوبې وکړای شي. موږ د قوانینو او مقرراتو ډېرې پلمې اورېدلې دي.»