تاند: (یکشنبه، د زمري ۲۹ مه ) د طالبانو د دفاع وزارت لوی درستیز قاري فصیح الدین فطرت ویلي، چې د افغانستان د سرحدي ځواکونو شمېر یې ۴۶ سلنه زیات کړی.
نوموړي په یوه خبري غونډه کې دا هم وویل، چې له ۶ ګاونډیو هېوادونو سره پر پوله یې د پلټنې ۶۰۰ نوي چیک پاینټونه جوړ کړي.
هغه د خپلو ځواکونو د روزنې خبر هم ورکړی او ویلي، چې سرحدي مسایلو ته یې ځانګړې پاملرنه کړې ده.
په وروستیو کې د طالبانو او یو شمېر ګاونډیو هېوادونو ترمنځ ناندرۍ لیدل کیږي.
له دې ډلې، د دوی تر ټولو نږدې متحد پاکستان طالبان تورنوي، چې د پاکستاني طالبانو لخوا یې د افغان خاورې د استعمال مخنیوی نه دی کړی.
طالب چارواکو بیا دا تورونه رد کړي دي.