تاند(پنجشنبه، د اسد ۲۶مه) د طالبانو د حکومت د بهرنیو چارو وزارت پرون (چهارشنبې) له هیواده دباندې د افغاني پاسپورټونو لپاره نوې بیې اعلان کړې.
دغه وزارت په یوه خبرپاڼه کې ویلي چې د خلکو اقتصادي ستونزو ته په کتو د بهرنیو چارو، کورنیو چارو او مالیې وزارتونو په وړاندیز او د ريیس الوزرا په حکم له هیواده دباندې د ۵ کلن پاسپورټ بیه ۱۲۰ او د ۱۰ کلن هغه ۲۲۰ امریکايي ډالره ټاکل شوې ده.
په خبرپاڼه کې وړاندې ویل شوي چې د یو کال تمدید لپاره به ۲۰ ډالره اخیستل کېږي.
دا په داسې حال کې ده چې د افغانستان سفارتونه د پنځو کلونو لپاره پاسپورټ د سټېکر په وسیله په ۲۰۰ یورو تمدیدوي.
تر دې څو ورځې مخکې د کورنیو چارو وزارت ړ پاسپورټ د وېش په بهیر کې د چټکتیا لپاره اعلان وکړ چې نور څوک اړتیا نه لري چې خپله تذکره د احصاییې او معلوماتو په ملي اداره کې تایید کړي.
دغه وزارت وویل، له دې وروسته د پاسپورټ د اخیستو لپاره د تذکرې تایید د پاسپورټ په ریاست کې دننه کېږي.
پخوا د تذکرې تایید د احصایي او معلوماتو ملي اداره کې کېده چې څو ورځې وخت یې نیوه او ګڼو خلکو یې په اړه شکایتونه درلودل.
د طالبانو له واک ته رسیدو وروسته پر له پسې د پاسپورټ بیه لوړه شوې ده خو دا به لومړی وار وي چې د پاسپورټ د بیې د کمېدو پرېکړه کیږي.