تاند: (سې شنبه، د زمري ۲۴ مه )  د طالبانو د کانونو او پټرولیم وزیر شېخ شهاب‌الدین دلاور له خپلو پلویانو وغوښتل چې له ملت سره ښه چلند وکړي.

نوموړي د دوی د رژیم د دویمې کلیزې په مناسبت د جوړې شوې  غونډې پر مهال خبرداری ورکړ، چې که چارواکي د خلکو غوښتنو ته پام و نه کړي، د مخکني حکومت د چارواکو له برخلیک سره به مخ شي.

شېخ دلاور وویل:”که د خپل عزت غم را سره و، که د خپل وزارت غم را سره و، د خپلو ساتونکو غم را سره و، د خپلو عکسونو  غم را سره و، بیا داسې حال زموږ وي. هغوی ډېرې ډېرې کړې، بلند منزلونه یې جوړ کړل، غصبونه یې وکړل، خو افغانستان ترې پاتې شو. “

دغه طالب مقام یادې څرګندونې په داسې مهال کوي، چې له طالبانو د خلکو د نارضایتۍ خبرونه په زیاتیدو دي.

یو شمېر افغانان شکایت کوي، چې طالبانو واک په بشپړ ډول انحصار کړی، له خلکو او خاصتاً ښځو څخه یې د زده کړو، کار، ټولنیزو فعالیتونو او حتا لباس او سلیقې حق اخېستی او خپل مخالفان په هره ممکنه بڼه ځپي او له هېواده وتو ته مجبوروي.

دوی د طالب مشرانو پر ورته څرګندونو هم شک کوي او وایي، چې په تېرو دوو کلونو کې یې خپل هغه کسان خلکو  ته ښودلي او مجازات کړي نه دي، چې د خلکو د ځورولو سبب شوي دي.