تاند: (دوشنبه، د زمري ۲۳ مه ) راپورونه وایي، چې د خوست ښار سپین جومات ته نیږدې په یوه هوټل کې درنه چاودنه شوې ده.
د کابل د امنیه قومندانۍ لپاره د طالبانو د رژیم ویاند خالد ځدراڼ ویلي، چې په دغه چاودنه کې یو شمېر وزیرستاني کډوال او د خوست اوسیدونکي وژل شوي.
هغه د وژل شویو شمېر درې او د ټپیانو اوه تنه ښودلی.
سیمه ییزو سرچینو بیا ویلي، چې د مرګ ژوبلې اندازه تر دې زیاته ده.
د پېښې نور جزیات نه دي روښانه شوي.
د دغې چاودنې مسوولیت چا پر غاړه نه دی اخیستی.
ګومان کیږي، چې د چاودنې اصلي هدف د تحریک طالبان پاکستان یو شمېر غړي، چې په خوست ولایت کې اوسیدل، وي.
طالبان، په افغانستان کې د دې ډلې موجودیت ردوي.