تاند (پنجشنبه، د اسد ۱۹مه) په کندوز ولایت کې په یوه ترافیکي پېښه کې یو تن مړ شوی او ۴۵ نور ژوبل شوي دي.
دا پېښه د چهارشنبې په ورځ ماسپښین مهال د امام صاحب ولسوالۍ کهنه قلعه ته نژدې شوې ده.
د کندوز د عامې روغتیا ریاست په یوه خبرپاڼه کې ویلي، یو پیک اپ موټر، چې ماشومان او ښځې پکې سپرې وې او واده ته روان وو، له سړکه واوښت او چپه شو.
د کندوز د روغتیا ریاست پر اساس، په دې پېښه کې یو ماشوم، چې ۸ کلن و، مړ شوی او ۴۵ نور، چې ښځې او ماشومان دي، ژوبل شوي دي.
خو ډاکتران وايي چې د ګڼو ټپیانو حال نازک دی او ممکن د مړینو شمېر زیات شي.
ټپیان د امام صاجب او کندوز روغتونونو ته وړل شوي دي.
د دې پېښې علت د چلوونکي بې احتیاطي او تر اندازې زیات سرعت بلل شوی دی.