تاند (چهارشنبه، د اسد ۱۸مه) د افغانستان د طالبانو حکومت د پاکستان د دې تور په ځواب کې چې د دغه هیواد په بریدونو کې افغانان لاس لري، وویل، په تېر یوه کال کې په افغانستان کې د داعش لسګونه پاکستاني غړي وژل شوي یا نیول شوي دي.
د حکومت ویندوی ذبیح الله مجاهد نن (چهارشنبه) فرانس پریس خبري اژانس ته وویل:«تېر کال زموږ (امنیتي) ځواکونو ۱۸ تنه له منځه یووړل چې پاکستانیان ول.»
ده زیاته کړه:«دوی د داعش غړي وو، په بیلابیلو بمي او نورو حملو کې یې لاس درلود.»
مجاهد همداراز وویل، لسګونه نور ژوندي نیول شوي او اوس د افغانستان په محبسونو کې دي.
مجاهد پرون (سې شنبه) پر خپله ټویټرپاڼه کښلي و چې د سیمې په هیڅ هیواد کې د امنیت په برخه کې د ناکامۍ پړه باید د افغانستان د چارواکو په غاړه وانه چول شي.
تر دې یوه ورځ وړاندې؛ یعني د دوشنبې په ورځ د پاکستان د پوځ لوی درستیز جنرال سید عاصم منیر په پېښور کې یوې غونډې ته ویلي و چې په پاکستان کې د ترهګرۍ لپاره هیڅ ځای نشته او په پاکستان کې د ترهګرۍ په پېښو کې د افغانانو ښکیلتیا د سیمې ثبات او سولې ته یو خنډ دی.
ده په افغانستان کې د طالبانو حکومت ژمنو ته په اشارې وویل، «دا د دوحې د تړونه سرغړونه ده.»
دې ته ورته تورونه له دې مخکې د پاکستان د بهرنیو چارو او دفاع وزارتونو له لوري هم لګول شوي دي. څه موده وړاندې د پاکستان د بهرنیو چارو وزارت ادعا وکړه چې د پاکستان په ناامنیو کې ځینې افغانان هم ښکېل دي او دوی یې ثبوتونه او شواهد د طالبانو له حکومت سره شریک کړي دي.
د بلوچستان د ژوب پر چاوڼۍ د حملې د عاملانو په اړه پاکستاني چارواکو ادعا کړې چې له ۵ بریګرو ځنې یې ۳ افغانان وو. دوی همداراز په باجوړ کې د جمعیت علمای اسلام ګوند پر غونډه د داعش د برید عامل هم د افغانستان تبعه بللی دی.
د پاکستان د تورونو د رد په اړه د ذبیح الله مجاهد اعلامیه:
