تاند(چهارشنبه، د اسد ۱۸مه) د ایران د بهرنیو چارو وزیر حسین امیرعبدالهیان وايي، په ۱۳۷۷ لمریز کال په مزارشریف ښار کې د ایراني دیپلوماتانو د وژلو په پېښه کې د طالبانو د رول په اړه یې د دوی له باندنیو چارو وزیر څخه پوښتنه کړې ده.
د تسنیم خبري اژانس د راپور له مخې، عبدالهیان پرون (سې شنبې) په یوه ټویټ کې ولیکل چې «د افغانستان د بهرنیوچارو وزارت له سرپرست ملا امیرخان متقي سره په لومړنۍ کتنه کې یې له هغه وپوښتل چې په مزارشریف ښار کې د ایران د کونسلګرۍ له ترخې پېښې سره خپل ارتباط څرګند کړي.»
ده په دوام کې د امیرخان متقي ځواب د نوموړي له قوله کښلي:«د نننیو طالبانو او هغو ترمنځ هیڅ تړاو نه شته. هغه انساني ضد اقدام غندوو.»
د ایران د بهرنیو چارو وزیر نه دي ویلي چې له امیرخان متقي څخه یې دا پوښتنه کله کړې ده.
۲۵ کاله پخوا د ۱۳۷۷ لمریز کال د اسد په ۱۷ مه مزارشریف ښار ته د طالبانو د سوبمن ځواک له ننوتو سره سم، څو تنه په مزارشریف ښار کې د ایران کونسلګرۍ ته ننوتل، اته دیپلوماتان او یو ایرانی خبریال یې ووژل.
طالبانو هماغه مهال په دې پېښه کې لاس لرل رد کړل خو ایران خپل ځواکونه د افغانستان پولې ته راواستول چې له طالبانو غچ واخلي، ووروسته ایراني چارواکو سلا په دې کې ولیده چې د افغانستان په جبۍ کې ځان ښکېل نه کړي.