تاند: ( سې شنبه، د زمري ۱۰ مه ) د طالبانو کورنیو چارو وزارت ویاند عبدالمتین قانع د هغو کسانو ځانګړنې اعلان کړې، چې د پاسپورټ اخېستو وړ نه دي.
نوموړي په یوه ټویټ کې ویلي، چې پوروړي، په جزایي، مدني او سوداګریزو قضیو کې د محکمو له لوري محکوم کسان، بې سرپرسته ماشومان او هغوی چې ممنوع الخروج دي، د پاسپورټ اخېستو فرصت نه ورکول کیږي.
په وروستیو کې د پاسپورټ اخېستو غوښتنې تر پخوا هم زیاتې شوې دي.
د بشري او اقتصادي ناورین له شدت او د طالبانو د قیوداتو له زیاتوالي سره، یوه د پام وړ برخه افغانان د پاسپورټ اخېستو په وسیله له هېواده د وتو هڅې کوي.
طالبان بیا لویدیځ هېوادونه تورنوي، چې له افغانستانه خلک وتو ته هڅوي.