تاند: ( سې شنبه، د زمري ۱۰ مه ) په داسې حال کې، چې افغانستان شپږ ګاونډي هېوادونه لري؛ د طالبانو د سرحدونو او قبایلو وزیر نورالله نوري ویلي، چې د افغانستان له پنځو ګاونډیانو سره یې د پولو د مشخصولو د پلان په عملي کولو پيل کړی.
نوموړي پرون وویل، له ایران، ترکمنستان، ازبکستان، تاجکستان او چین سره د افغانستان د پولو د نخښه کولو چارې په ځینو برخو کې بشپړې شوي دي.
نوري د خبري کنفرانس پر ممهال د پاکستان یادونه ونه کړه.
دا په داسې حال کې ده، چې افغانستان له بل هر ګاونډي څخه ډېر، پاکستان سره د پولې په سر زیات او د پاکستان له رامنځته کیدو راهیسې جنجال لري.
د افغانستان د پرځول شوي جمهوري نظام یوه مقام تاند ته ویلي، د سرحدي چارو ادارو په رسمي څېړنو کې د افغانستان نږدې ټول ګاونډیان د افغانستان د ځمکني حریم ناقضان ثابت شوي.
سرچینه په ځانګړي ډول د آمو سېند څنډو ته پراته هېوادونه یادوي او زیاته کړې، چې په مختلفو بنو یې سېند د افغانستان سواحلو ته تمبولی او په دې ډول یې د پام وړ افغان خاوره لاندې کړې.
طالبانو د دې مسئلې او دغه راز پاکستان سره د سرحدي کرښو د نه مشخصولو د دلیل په اړه څه نه دي ویلي.