تاند: ( جمعه، د سرطان ۳۰ مه) په کابل کې د ترکیې سفارت تعلیمي اتاشې په داسې مهال افغان محصلانو ته د کال ته ۳۰۰ نور بورسونه اعلان کړل، چې یو شمېر خلک یې د وېش پر څرنګوالي نیوکې کوي.
باختر خبري اژانس راپور ورکړی، چې د ترکیې د سفارت تعلیمي اتاشې چنګېز دیمیر دا خبره د طالبانو د لوړو زده کړو وزارت له مرستیال ډاکتر لطف الله خیرخواه سره په کتنه کې وکړه.
له دې سره، یو شمېر افغانان نیوکه کوي چې د ترکیې تحصیلي بورسونه تر ډېره افغان ترک توکمو ته ځانګړې دي او په ځانګړي ډول پښتنو محصلانو او پر شرایطو برابر کسانو ته ونډه نه پکې ورکول کیږي.
په کابل کې د ترکیې سفارت بیا د خپلو تحصیلي بورسونو پر شفافیت ټینګار کړی.
طالبانو د دغو بورسونو د وېش په اړه د کوم مېکانیزم یادونه نه ده کړې.