تاند: ( چار شنبه، د سرطان ۲۸ مه) د طالبانو د دفاع وزیر ملا یعقوب مجاهد خپلو ځواکونو ته امر کړی، چې باید پوځي یونیفورم واغوندي.
د نوموړي په لاسلیک یو مکتوب، چې یوه کاپي یې تاند ته رسیدلې؛ طالب ځواکونو ته پکې له پوځي یونیفورم سره د شخصي البسې د نه استعمال هم ویل شوي.
د طالبانو له بیا واکمنیدو نیږدې دوه کاله کیږي، خو لا یې ځواکونه د یونیفورم او له یو بل سره د تفکیک له اړخه منظم نه دي.
د طالبانو لخوا د شخصي لباسونو استعمال، ځينې خلک د نا امنیو له پېښو سره هم تړي او وایي د دوی شخصي لباس ته په ورته لباسونو کې، ځينې جنایي ډلې غلاوې او نور جرمونه هم ترسره کوي.
د طالبانو دفاع وزیر اوس ویلي، چې ځواکونه به یې څارل کیږي، څو معلومه شي، چې څوک دغه پریکړه عملي کوي او څوک سرغړونه ورڅخه کوي.