تاند: ( یکشنبه، د سرطان څلورمه) په کونړ کې یو شمېر ځایي خلک د دغه ولایت د ځنګلونو اور اخیستو ته د شک په سترګه ګوري او له طالب چارواکو یې د مخنیوي ترڅنګ د وضاحت غوښتنه کوي.
یو شمېر ځایي اوسیدونکو، چې د حساسیت له امله یې نه غوښتل نومونه یې خپاره شي، تاند ته وویل، چې په وروستیو کې له دغه ولایت څخه د لرګیو قاچاق بیا زیات شوی او شک لري، چې د ځنګلونو د وروستیو اورلګیدنو تر شا هم د قاچاقبرانو لاس وي.
ددوی په وینا، شکمن دي چې طالب چارواکي هم له قاچاقبرانو سره ملګري وي او د اورلګیدو له پېښې سره هم مهاله، لا زیات چارتراش له ځنګلونو قاچاق کړل شي.
دا په داسې حال کې ده، چې د کونړ لپاره د طالبانو ځايي چارواکو په پېچ درې ولسوالۍ کې د اورلګېدنې له کبله د لسګونه جريبه ځنګله د سوځېدو خبر ورکړی دی.
د ياد ولايت له پېښو سره د مبارزې ادارې يو مسئول احسان الله ويلي، چې په دغې اور لګېدنه کې ۱۴ هکتاره او ۸۰ جريبه ځنګل له منځه تللي دی.
د نوموړي په خبره اور وړمه ورځ د دې ولايت د پيج درې ولسوالۍ د سندرۍ او کړنګل په ځنګلونو کي رامنځته شوی، چې له امله يې تر دې وخته پورې ۱۴ هکتاره او ۸۰ جريبه ځنګل او مالڅر سوځيدلی.
تر دې دمه د اور لګېدنې علت نه دی معلوم شوی.
له څه مودې راهیسې دا څووم ځل دی، چې د کونړ په ځنګلونو کې د اورلګیدو خبر ورکول کیږي.
ای اس ای