تاند: ( یکشنبه، د سرطان څلورمه)  پاکستان د امریکا متحده ایالاتو او هندوستان د مشرانو پرهغې ګډې اعلامیې نیوکه وکړه، چې واشنګټن ته د هندي صدراعظم نریندرا مودي د سفر پر مهال خپره شوې ده.

په دې اعلامیه کې له پاکستانه غوښتل شوي، چې خپله خاوره د اورپکو د بریدونو لپاره د اډې په توګه نه کارول کیدو ته نور پرې نه ږدي.

پاکستان دا ګډه اعلامیه بې بنسټه، یو اړخیزه او ګمراه کوونکی بولي.

د پاکستان د بهرنیو چارو وزارت وویل: دا ډول څرګندونې د ډیپلوماټیکو معیارونو خلاف دي .

پاکستان وایي، د ترهګرۍ خلاف د امریکا د نیږدې ملګري په توګه ورته دا اعلامیه حیرانونکې ده.

د امریکا او هند په ګډه اعلامیه کې ویل شوي: دوی (بایډن او مودي) د پولې په اوږدو کې ترهګري، د ترهګرو لخوا د نیابتي ځواکونو کارول په کلکه وغندل او له پاکستانه یې وغوښتل چې سمدستي ګامونه واخلي ترڅو ډاډ ترلاسه شي چې هیڅ سیمه یې د ترهګریزو بریدونو لپاره ونه کارول شي.

د پاکستان د بهرنیو چارو وزارت پر اسلام اباد د افراطیت د تورونو په لګولو سره هند د کشمیر له وضعیت او په هند کې د اقلیتونو له چلند څخه د نړیوالې ټولنې د پام اړولو په هڅه تورن کړ.

ډیلي له کلونو راهیسې پاکستان په هند کې د بریدونو په ترسره کولو تورنوي، په دې بریدونو کې د 2008 د ممبۍ برید هم شامل دی، چې له 165 څخه ډیر کسان پکې ووژل شول.

هند وایي پاکستان د هغو وسله والو ملاتړ کوي چې له ۱۹۸۰ لسیزې راهیسې په کشمیر کې د هند له امنیتي ځواکونو سره په جګړه بوخت دي.