تاند: ( شنبه، د سرطان درېیمه) د طالبانو د ریاست الوزرا سرپرست او سياسي مرستيال مولوي عبدالکبير وایي د دوی رژیم د ټول شموله حکومت جوړولو ته ژمن دی.
هغه دغه راز ادعا کوي، چې دوی رژیم اوس هم ټول ګډونه دی او پکې د هر قوم او ولايت استازي موجود دي.
نوموړي د افغانستان په چارو کې د ملګرو ملتونو د ځانګړي همغږي کوونکي او خپلواک مفتش “فریدون سینیرلیوغلو” سره په لیدنه کې، د دې خبرې ترڅنګ پر سیاسي مسایلو سربېره د امنیت او نشه یي توکیو پر ضد هم خبرې وکړې.
په تېرو دوو کلونو کې نړیوالې ټولنې تل په افغانستان کې د یوه ټول شموله حکومت پر جوړېدو ټینګار کړی دی.
مولوي عبدالکبیر د جون په لومړیو کې یوې غونډې ته ویلي وو: که د ټول شموله معنی دا وي چې ځینې فاسد عناصر چې په افغانستان کې ځای نه لري. او تښتېدلي دي او د پردیو غلامان دي، دا زموږ د ملت او حکومت لپاره د منلو وړ نه ده. د دغو کسانو په شتون سره حکومت ټول شموله نه دی او حکومت له فساد سره مخ دی.
دغه طالب مقام همدا شان د ملګرو ملتونو له استازي سره د لیدنې پر مهال، د نړیوالو له لوري د دوی د په رسمیت پېژندلو غوښتنه هم کړې ده.
نړیواله ټولنه، خاصتاً ملګري ملتونه وایي که طالبان غواړي په رسمیت وپېژندل شي، د په رسمیت پېژندلو شرایط او په سر کې بشري، ښځینه او د خلکو اساسي حقونو ته باید غاړه کیږدي.
افغان څارونکي بیا باور لري، چې افغانستان ټول شموله نه، بلکې منتخب، قانومند او ولسواک نظام ته اړتیا لري.
د دوی په باور، د ټول شموله حکومت په نوم ځينې هېوادونه غواړي د طالبانو رژیم سره خپلې استخباراتي مهرې ملګري کړي، چې هغوی هم د طالبانو په شان د افغانستان په خیر نه دي.