تاند: ( شنبه، د سرطان درېیمه) ترکي رسنیو اعلان وکړ چې د افغان کډوالو د ایستلو د بهیر په دوام د دغه هېواد له بېلابېلو ښارونو ۲۲۹ نور کسان بېرته افغانستان ته شړل شوي دي.
د ترکیې رسمي خبري اژانس (اناتولیا) په یوه راپور کې ویلي چې دغه پناه غوښتونکي په غیر قانوني توګه په ترکیه کې اوسیدل.
ترکي چارواکو ویلي دي چې د ترکیې په ختیځ کې پروت د «اګري» په ښار کې د غیر قانوني پناه غوښتونکو د پېژندلو لړۍ دوام لري.
تېر کال ترکیې ۵۷۱۷۴ کډوال افغانستان ته استولي وو.
ویل کېږي چې د روان کال له پیله تر اوسه په سلګونو افغانان چې د اوسېدو کره اسناد یې نه درلودل د ترکیې له بېلابېلو ښارونو څخه افغانستان ته شړل شوي دي.
ترکیه اروپا ته د افغان کډوالو د تګ یوه له مهمو لارو څخه ده.
په افغانستان کې له وروستیو بدلونونو، وروسته ترکیې ته د افغان کډوالو راتګ زیات شوی دی.
ترکیه د نورو سیمه ییزو هېوادونو په شان، بیا- بیا افغان کډوالو سره په ناوړه چلند تورن شوی، خو د طالبانو رژيم ورسره د ښو اړیکو له امله په دې اړه کوم اعتراض نه دی کړی.