تاند (دوشنبه، د جوزا ۱۹ مه) ټاکل شوې ده چې د ملګرو ملتونو د بشري حقونو شورا نن (دوشنبه) د سویس په جینوا کې د افغانستان پر بشري وضعیت، په تېره بیا د ښځو او نجونو د حقونو په باب خبرې وکړي.
د افغانستان د بشري حقونو لپاره د ملګرو ملتونو ځانګړي راپورتر ریچارډ بنیټ تېره دوشنبه ویلي و چې په دې غونډه کې د ګډون ترڅنګ د افغانستان د بشري حقونو د وضعیت په اړه خپل راپور وړاندې کوي.
د بخښنې نړیوال سازمان هم په یوه اعلامیه کې ویلي چې ریچارډ بنيټ او د حقوقپوهانو د نړیوال کمیسیون د حقوقي تګلارې د برخې مسوول یان سایدرمن به د افغانستان د بشري وضعیت په ځانګړي ډول د ښځو د وضعیت په اړه ویناوې وکړي.
په دغه راپور کې چې یوه برخه یې د پنجشنبې په ورځ خپور شو، ویل شوي چې په افغانستان کې د ښځو او نجونو په وړاندې د سیستماتیک یا منظم تبعیض تر ټولو ښکاره بېلګه د طالبانو له خوا د فرمانونو، پرېکړو او دستورالعملونو صادرول دي چې د ۲۰۲۱ کال له سپټمبر څخه د ۲۰۲۳ کال تر مې میاشتې پورې یې شمېر څه باندې پنځوسو ته رسېږي.
طالبانو په دغو فرمانونو کې حمامونو، تفریحي ځایونو، پارکونو او لوبغالو ته د ښځو تګ منع کړی، همداراز یې له محرم پرته دهغوی پر سفر بندیز لګولی دی.
دا په داسې حال کې ده چې طالبانو د نجونو پر زده کړو هم له شپږم ټولګي پورته بندیز لګولی دی.