تاند:(دوشنبه، د جوزا ۱۵ مه ) د طالبانو د عامې روغتیا وزارت سرپرست ډاکتر قلندر عباد په افغانستان کې د ایران د صادراتو ادارې له رئیس سره لیدلي.
د عباد دفتر په یوه خبرپاڼه کې ویلي، چې په دې کتنه کې د طبي ټکنالوژۍ او درملو په برخو کې د دواړو هېوادونو ترمنځ د سوداګرۍ د پراختیا په اړه خبرې شوي.
سرچینه زیاتوي، چې ډاکتر عباد له نوموړي څخه په افغانستان کې د سیروم د تولید فابریګې جوړولو برخه کې د همکارۍ غوښتنه وکړه.
ورته مهال په افغانستان کې د ایران د صادراتو ادارې رئیس د دواړو هېوادونو ترمنځ د سوداګرۍ پر پراختیا ټینګار وکړ او ویې ویل، چې له څېړنو وروسته به له دغه وزارت سره د سیروم د تولید د فابریکې په جوړولو کې همکاري وکړي.
د افغانستان د عامې روغتیا وزارت یوې سرچینې تاند ته وویل، چې افغانستان د جمهوري نظام پر مهال په کابل کې د څو میلیونه ډالرو په ارزښت د سیروم جوړولو فابریکې پر جوړولو لګولي وو .
د سرچینې د معلوماتو له مخې، د دې فابریکې کار د حامد کرزي د واکمنۍ پر مهال پيل او یو چینایي شرکت یې چارې مخته وړلې، خو د شرکت او د وخت د افغان چارواکو د غفلت او فساد له امله دا کار نیمګړی پاتې او فابریکه بیرته د خرابیدو خطر سره مخ وه.
د تاند سرچینه زیاتوي، چې د جمهوري نظام په وروستیو کلونو کې د یادې فابریکې د بشپړولو هڅې ګړندي شوي وې او طالب چارواکي ممکن هماغه نیمګړې پاتې فابریکه د ایران په مرسته ترمیم او د نوې فابریکې په نوم اعلان کړي.