تاند:( شنبه ، د غویي ۳۰ ) د طالبانو دفاع وزارت وایي، چې د ایران د لوی درستیز د مرستیال بهرام “حسیني مطلق” په مشرۍ یوه پوځي پلاوي کابل ته د سفر پر مهال د دوی چارواکو سره پر سرحدي ستونزو خبرې کړي دي.
د طالبانو د اعلامیې له مخې، یاد شوي پلاوي د طالبانو د لوی درستیز مرستیال حاجي مالي خان “صدیق” سره لیدلي دي.
د طالبانو د لوى درستيز مرستيال په دې لیدنه کې ویلي: موږ تل د ایران له اسلامی جمهوریت سره د ښو اړیکو غوښتونکی وو او په بېلابېلو برخو کې د لازیاتې همکارۍ لپاره ژمن یوو.
طالبان وایي، ايراني پلاوي په بېلابېلو برخو کې د دواړو هېوادونو ژمنې مثبتې و ارزولې او د اړيکو د پياوړتيا ډاډ يې ورکړ.
سرچینه زیاتوي: په دې کتنه کې دواړو لورو دسرحدي ستونزو په هواري، د ګډو همکاريو پر پياوړتيا او د اړوندو مراجعو له لارې د ستونزو په حل د خبرو له لارې ټينګار وکړ.
دا په داسې حال کې ده، چې په وروستیو کې له افغانستان څخه د اضافي اوبو د غوښتو په سر د ایران او طالبانو اړیکې ترینګلې شوي دي.