تاند:( شنبه ، د غویي ۳۰ ) د طالبانو د رئیس الوزرا اقتصادي مرستیال ملا عبدالغني برادر نن په فراه کې د بخش آباد د اوبو بند د جوړیدو چارې پرانیستې.
د طالب چارواکو په وینا، د بخش آباد بند ښي طرف ته د ۵۰ کیلومتره او چپ لوري ته د ۵۲ کیلومتره کانال په لرلو سره، په ټولیز ډول ۶۸۵۹۰ هکتاره کرنیزه ځمکه خړوبوي.
بخش آباد بند له ډېرو کلونو راهیسې په پام کې وه، چې جوړ شي، خو د جمهوري نظام چارواکو یې طالبان د جوړیدو خنډ ګڼل.
په وروستیو کې له فراه ولایت څخه د ځمکې لاندې اوبو د بېساري کمښت او له امله یې د سیمه ییزو خلکو د کډوالۍ خبرونه ورکړل شوي.
ځایي اوسیدونکي باور لري، چې که د بخش آباد بند جوړ او د دوی اوبه سمې مدیریت شي، کرنه به په بېساري ډول وده وکړي او د هېواد اقتصاد ته به ډېره ګټه ورسوي.
طالبانو د بخش آباد بند د جوړیدو لګښتونه او نور جزیات نه دي په ډاګه کړي.
د دوی لخوا د اوبو د مدیریت هڅې د ولسمشر غني د پروګرامونو دوام ګڼل کیږي او خلک یې ستاینه کوي.