تاند:( شنبه ، د غویي ۳۰ ) د طالبانو د کډوالو چارو وزارت ادعا کړې، چې اوړمه ورځ (۲۷۳۱) تنه افغان کډوال له ایران څخه خپل هېواد ته ستانه شوي.
سرچینه وایي، چې دغه کډوال د هرات ولايت د اسلام قلعه له لارې هېواد ته راستانه شول.
د اسلام قلعه د سرحدي آمر په خبره د يادو راستنېدونکو له ډلې (۵۴۷) تنه د مرستو په موخه د مهاجرت نړيوال سازمان (IOM) ته ور وپېژندل شول.
طالبان دا څرګندونې په داسې مهال کوي، چې ایران کې مېشت کډوال د دغه هېواد له لوري په زوره د کډوالو د ویستو شکایت کوي.
د دوی په باور، په دې کار کې طالبان هم ایران سره پټه همغږي لري.
طالبانو په ایران کې د افغان کډوالو د ستونزو او پر ضد یې د سختو قیوداتو په اړه څه نه دي ویلي.