تاند:( شنبه ، د غویي ۳۰ ) د هلمند سیند د اوبو پر سر د طالبانو او ایران له ظاهري جنجال سره هم مهاله، د طالبانو د بهرنیو چارو وزارت مرستیال ویاند ضیا احمد تکل ویلي، چې د دوی حکومت دوه سوه هغه افغان بندیان د ایران له زندانونو خوشې کړي او افغانستان ته لیږدولي، چې د اعدام په سزا محکوم شوي وو.
له دې سره، د بشري حقونو سازمانونو راپور ورکړی چې ایران په تېرو پنځو میاشتو کې لږ تر لږه اوه افغانان اعدام کړي دي.
د طالبانو د بهرنیو چارو وزارت مرستیال ویاند وویل چې د ایران له چارواکو سره د افغان بندیانو د ستونزو د هواري په اړه د طالبانو ناستې دوام لري.
ایراني چارواکو د طالبانو او بشري حقونو د سازمانونو څرګندونو ته ځواب نه دی ویلی.
په وروستو کې د طالبانو او ایراني چارواکو ناندرۍ زیاتې شوي، چې ورسره یو زیات شمېر افغانانو د طالبانو ننګه کړې او ایران یې د افغانستان پر وړاندې د غلطو سیاستونو له امله غندلی دی.