تاند: ( چار شنبه، د غويي ۲۷ ) له ماشومانو د ملګرو ملتونو د ملاتړ صندوق يونيسف په افغانستان کې د سيمهييزو درسي ټولګيو د شمېر د زياتوالي خبر ورکوي.
د دغه سازمان پر ټوېټرپاڼه ليکل شوي چې غواړي په افغانستان کې د يادو ټولګيو شمېر ۲۱ زرو ته لوړ کړي.
يونيسف زياته کړې، دمګړۍ په باميانو کې ۶۴۴ سيمهييز ټولګي فعال دي چې ۹ زره او ۴۹۹ ماشومان په کې زده کړې کوي.
سيمهييز ټولګي د يونيسف د چټکو زده کړو د پروګرام برخه ده ،چې د اسيا بانک، نړيوال بانک، جنوبي آسيا او د اروپايي ټولنې د بشري مرستو د پروګرام له لوري تمويلېږي.
دا په داسې حال کې ده، چې د طالبانو رژيم لا هم له شپږم ټولګي څخه پورته زده کړو ته د نجونو د ورتلو خنډ دی او وايي شرايط ورته نه دي مساعد.