تاند- د ګوګل شرکت د «دیپ مایډ» د مصنوعي ځیرکتیا ورکشاپ ريیس ډمیس هاسابیس وايي، داسې مصنوعي ځیرکتیا / ذهانت به، چې د انسان د ماغزو هومره وړتیا ولري، په راتلونکو څو کلونو کې بازار ته راووځي.
ده د خپلې دې ادعا دلیل، په وروستیو څو کلونو کې د مصنوعي ذهانت چټک پرمختګ وباله.
هاسابیس دا ادعا په داسې حال کې کړې چې ځینو متخصصانو د مصنوعي ځیرکتیا د پراختیا او د هغې د پایلو په اړه اندېښنې څرګندې کړي او په عین حال کې د مصنوعي ځیرکتیا پلویان وايي چې د مصنوعي ځیرکتیا پراختیا به د انسانانو د ژوند کیفیت اوچت کړي.
د مصنوعي ځیرکتیا له پرمختګه اندېښنه لرونکي وايي چې دا ټکنالوژي به ډېر شمېر انسانان وزګاره کړي.
په همدې حال کې ګوګل کمپنۍ په خپل لټون یا سرچ کې د مصنوعي ځیرکتیا د زیاتولو په لټه کې ده.
راپورونه وايي چې ممکن ګوکل له «بارډ» مصنوعي ځیرکتیا څخه په خپل سرچ مشین کې کار واخلي.
د ګوګل دا هڅه له مایکروسافټ کمپنۍ سره سیالي ګڼل کېږي.