تاند:( دوشنبه ، د غویي ۲۵ ) د اروپايي ټولنې د بهرنۍ تګلارې مسوول “جوزف بوریل” او په بهرنیو چارو کې د پاکستان د دولت وزیرې “حنا رباني کهر” د افغانستان د روان وضعیت په اړه خبرې کړي.
بوریل د دې ناستې د ویډیو په خپرولو سره زیاته کړې، چې د اروپايي ټولنې د هند- پاسیفیک غونډې په څنډه کې یې حنا رباني سره د افغانستان پر حالاتو خبرې کړې دي.
د اروپايي ټولنې د بهرنۍ تګلارې مسوول لیکلي چې له حنا رباني کهر سره یې د نظرونو ښه تبادله لرله.
حنا رباني د دې غونډې په اړه څه نه دي ویلي.
تر دې مخکې حنا رباني کهر د ملګرو ملتونو له سرمنشي انتونیو ګوتریش سره په لیدنه کې د طالبانو حاکم رژیم سره د خبرو اترو د “باور وړ بهیر” د رامنځته کولو لپاره له نړیوالې ټولنې سره د همکارۍ لپاره د خپل هېواد پر چمتووالي ټینګار کړی و.