تاند (پنجشنبه، د ثور ۷ مه) د پاکستان پوځ وايي، ډیورند کرښې ته نژدې یې درې پوځیان د وسله والو مخالفانو په برید کې وژل شوي دي.
د پاکستان د پوځ د رسنیو دفتر دا خبر وروسته له دې ورکړ چې دغه دفتر اعلان وکړ چې له افغانستان سره پر ډیورند کرښه یې د اغزن سیم او کټارې لګولو کار ۹۸ سلنه بشپړ کړی دی.
د پاکستان د پوځ په خبرپاڼه کې ویل شوي چې افغانستان ته څېرمه د بلوچستان ایالت په ژوب کې د دوی پر پوځیانو د افغانستان له خاورې برید وشو چې په نتیجه کې یې یو پوځي ووژل شو.
پوځ دغه راز ادعا کړې چې په یوه بله حمله کې، چې د خیبرپښتونخوا په تیرا سیمه کې وشوه، دوه پاکستاني پوځیان وژل شوي دي.
د پاکستان پوځ په وروستیو کې په ژوب او خیبرپښتونخوا کې د خپلو وسله والو مخالفانو د تګ راتګ د مخنیوي لپاره د عملیاتو د بیلولو خبر ورکړی و.
له بلې خوا د پاکستان ۶ پولیس پرون (پنجشنبې) په سند ایالت کې له یرغمل نیوونکو سره د نښتې په ترڅ کې ووژل شول.
د پولیسو په وینا، وسله والو انسان تښتونکو د یوه ځايي سوداګر زوی د بلوچستان ایالت له ډیره الله یار سیمې څخه تښتولی و.
په داسې حال کې چې پولیسو تښتونکي تعقیبول، ډزې پرې وشوې چې په نتیجه کې یې ۶ پولیس ووژل شول او یو تن ټپي شو.
د تښتوونکو او یرغمل شوي کس د برخلیک په اړه څه نه دي ویل شوي.