تاند (سې شنبې، د ثور۵مه) د افغان ښځو، نجونو او بشري حقونو لپاره د امریکا ځانګړې استازې رینا امیري وايي، د امریکا متحد ایالتونه به تر هغو د طالبانو له حکومت سره عادي اړیکې ټینګې نه کړي چې طالبانو بشري حقونو ته درناوی نه وي کړی.

اغلې امیري پر خپله ټویټرپاڼه کښلي:«ما ته پیغامونه رارسیدلي چې د طالبانو د حکومت د رسمیت پېژندلو په اړه پکې اندېښنې څرګندې شوي. موږ په زغرده وایو؛ له طالبانو سره به اړیکې تر هغو عادي نه شي چې هغو د ټولو افغانانو په تېره بیا ښځو حقونه رعایت کړي نه وي.»

I have received a number of messages expressing concern regarding recognition of the Taliban. We remain clear. There will be no normalization of relations with the Taliban without respect for the rights of all Afghans, especially women.

— U.S. Special Envoy Rina Amiri (@SE_AfghanWGH) April 25, 2023

سره له دې چې تراوسه پورې د نړۍ یوه هېواد هم د طالبانو حکومت په رسمیت نه دی پېژندلی، خو د قطر د غونډې په درشل کې د ملګروملتو د سرمنشي مرستیالې امنې محمد ویلي و چې د دوحې په غونډه کې به د طالبانو د حکومت د رسمیت پېژندنې په اړه هم خبرې وشی. هغې وروسته خپله خبره واخیسته. همداراز طالبانو ته ځینو نژدې کسانو هیله ښوولې وه چې د دوی حکومت به په رسمیت وپېژندل شي.

طالبانو نجونو ته لا هم تر شپږم ټولګي پورته د نور تعلیم اجازه نه ده ورکړې او د نجونو پرمخ یې د پوهنتونو دروازې هم وتړلې.

وروسته له هغې چې طالبانو روانه میلادي میاشت د ملګرو ملتونو په ادارو کې د ښځو او نجونو کار منع کړ، دې کار یې پراخ عکس العملونه وپارول.

طالبان بیا وايي چې دوی تر بل هر وخت د افغان ښځو حقونه ډیر رعایت کړي او د هغوی عزت یې خوندي کړی دی.